close

Vendi

Top LajmeVendi

MARRËVESHJA E PRESPËS: DEBAT NË DISTANCË MOSKË – ATHINË

Screenshot_1

Tensionimi i dytë i raporteve Rusi-Greqi


Moska ka bërë një tjetër ndërhyrje të ashpër pas zhvillimeve të fundit rreth marrëveshjes së Prespës. Një deklaratë e ministrisë së jashtme ruse, “godet” njëkohësisht Shkupin dhe Athinën. Deklarata nënvizon se ndryshimet kushtetuese të votuara në parlamentin maqedonas “janë imponuar nga jashtë dhe nuk shprehin vullnetin e popullit”. Po ashtu, edhe Athina kritikohet se ka injoruar opinionin e popullit grek që e kundërshton këtë marrëveshje.

Deklarata i referohet edhe largimit të Panos Kammenos nga koalicioni qeveritar dhe procesit të votëbesimit për qeverinë Tsipras. Me tone gjithashtu të ashpra ka qenë përgjigjja e ministrisë së jashtme greke. Në reagimin e Athinës shprehet “shqetësimi i përligjur” që deklarata ruse nuk merr parasysh funksionimin demokratik të institucioneve në Greqi, i cili funksionim “nuk përbën terren të përshtatshëm për komente nga palë të treta”.

Gjithashtu Athina nënvizon se deklarata e Ministrisë së Jashtme ruse “nuk i shkon për shtat nivelit që karakterizon marrëdhëniet Greqi-Rusi dhe lidhjeve shekullore të miqësisë midis të dy popujve”. Ky është tensionimi i dytë në raportet Athinë – Moskë, që nga vera e kaluar. Atëherë Greqia dëboi dy diplomatë rusë, të cilët u akuzuan se po përpiqeshin të korruptonin zyrtarë lokalë, klerikë ortodoksë dhe qytetarë, me qëllim që ata të zhvillonin protesta kundër marrëveshjes së Prespës. /Robert Goro, Athinë/

read more
Top LajmeVendi

ARRATISJA E GRUEVSKIT: HAN PËR MIA-NUK JAM NAIV PËR MËNYRËN E ARRATISJES

han

“Duhet pritur raporti i MPB-së”


Komisioneri Johanes Han thotë se nuk është naiv kur bëhet fjalë për mënyrën e arratisjes së Gruevskit nga Maqedonia në Hungari, ku ka përfituar azilin. Han është i vetëdijshëm se duke marrë parasysh rrugën e arratisjes, ai nuk ka qenë i drejtpërdrejtë, por në të gjithë rajonin, që për Komisionerin është një shenjë se ka pasur një bashkëpunim rajonal që aspak nuk i pëlqen. Këtë ua ka bërë me dije gjithë kolegëve të rajonit – thotë Han në intervistën për Agjencinë e Lajmeve MIA.

Për atë nëse mendon se Maqedonia është e përzier në arratisjen e Gruevskit, Han vlerëson se duhet të pritet raporti i MPB-së që të kuptohet se çka ka ndodhur. Han nuk ka biseduar në mënyrë të drejtpërdrejtë me Kryeministrin hungarez Orban rreth azilit të Gruevskit, por thotë se ka qenë i informuar për çështjen dypalëshe mes kandidatit për azil dhe autoriteteve dhe se nuk ka obligim të thuhen publikisht shkaqet e dhënies së azilit. Komisioneri Han vlerëson se Gruevski më mirë është të gjykohet në vendin ku është bërë vepra dhe konform shtetit juridik. /Klan Maqedoni/

 

read more
Top LajmeVendi

 IVANOV: PUBLIKIMI I LIGJIT TË GJUHËVE, KUNDËRKUSHTETUES

IVANOV-696×392

Cënohet shteti juridik


Lidhur me publikimin e Ligjit për Përdorimin e Gjuhëve dhe Ligjit për Ratifikimin e Marrëveshjes së Prespës në Gazetën Zyrtare dhe pa nënshkrimin dhe dekretin e Presidentit, ka reaguar ky i fundit duke i quajtur këto veprime si antikushtetuese dhe antiligjore.

Presidenti Gjorge Ivanov përmes një deklarate me shkrim ka komentuar publikimin e Ligjit të Gjuhëve në ‘Gazetën Zyrtare”. Ai ka shkruar se publikimi i ligjit të gjuhëve dhe Ligjit për ratifikimin e Marrëveshjes së Prespës pa dekretin e Presidentit janë kundërkushtetuese.

“Me dorëzimin e dy ligjeve në “Gazetën Zyrtare” është shkelur Neni 75 i Kushtetutës së RM-së, derisa publikimi i ligjeve është bërë në mënyrë të jashtëligjshme dhe paraqet bazë për ndjekje penale” – shprehet Presidenti Gjorge Ivanov.

Presidenti Ivanov ka shkruar se ky moment do të tregojë nëse në Maqedoni ekziston Gjykata Kushtetutese, nëse funksionon prokuroria, nëse ka gjyqësor të pavarur dhe nëse ekziston sundimi i së drejtës.

“Pyes, nëse përfaqësuesit e lartë të bashkësisë ndërkombëtare, që përkrahin këtë koalicion qeveritar, do të prononcohen dhe do ta përkrahin këtë mënyrë të miratimit të ligjeve që sjellin pasoja të paparashikueshme dhe dëm ndaj drejtësisë dhe shtetit juridik” – ka shkruar mes tjerash Presidenti Ivanov në reagimin e tij me shkrim. /Klan Maqedoni/

 

 

 

read more
Top LajmeVendi

LIGJI PËR PËRDORIMIN E GJUHËVE: “GAZETA ZYRTARE”-PUBLIKIMI KONFORM KUSHTETUTËS

2_1547550489-6810508

Fusnotë në vendin për nënshkrim të Presidentit Ivanov


Ndërmarrja Publike “Gazeta Zyrtare” njoftoi se e ka publikuar Ligjin për Gjuhët, kurse vlerëson se kjo është konform Kushtetutës dhe ligjeve edhe pse Presidenti Gjorge Ivanov nuk e nënshkroi këtë ligj.

Nga “Gazeta Zyrtare” thirren në nenin 52, paragrafi 2 të Kushtetutës që thotë se “Ligjet hyjnë në fuqi, më herët në ditën e tetë nga dita e shpalljes, me përjashtimin që e vërteton Kuvendi, në ditën e publikimit”

“Konform kësaj, kurse në lidhje me Nenin 51, paragrafi 2 nga Kushtetuta e Maqedonisë, ku thuhet “Secili është i detyruar t`i respektojë Kushtetutën dhe ligjet” edhe ky institucion, që është i autorizuar t`i shpall rregulloret në RM, punën e saj çdoherë e realizon në kuadër të Kushtetutës dhe ligjeve dhe vetëm është duke plotësuar obligimin kushtetutes” – thuhet në reagimin e NP “Gazeta Zyrtare”.

Për publikimin e Ligjit të gjuhëve pa nënshkrimin e Presidentit Ivanov, ka reaguar VMRO-DPMNE-ja, nga ku thonë se Drejtori Martin Kostovski ka bërë vepër penale që nuk vjetërohet dhe se për këtë shkohet edhe në burg. Nga “Gazeta Zyrtare” thonë se ndaj çdo përpjekjeje për të rënuar dinjitetin e kësaj Ndërmarrje Publike do të ngritet procedurë përkatëse gjyqësore.

Kryeparlamentari Xhaferi, ligjin e kishte në sirtar më shumë se dhjetë muaj ngase Presidenti Ivanov refuzonte ta nënshkruajë edhe pas votimit të dytë në mars të vitit të kaluar.

Dekreti për shpalljen e Ligjit për përdorimin e gjuhëve është publikuar me fusnotë në vendin për nënshkrim të Presidentit Ivanov. Në fusnotë përmenden shkaqet e dekretimit pa nënshkrimin e presidentit, ku thuhet se secili është i obliguar t`i respektojë Kushtetutën dhe Ligjet sipas Nenit 51 paragrafi 2 të Kushtetutës.

Presidenti i vendit është i obliguar ta nënshkruajë dekretin për shpalljen e ligjeve nëse të njëjtat sërish miratohen me shumicë votash nga numri i përgjithshëm i deputetëve kurse Ligji i gjuhëve sërish u miratua me shumicë votash në seancën e 32-të të Kuvendit të Maqedonisë më 14 Mars të vitit 2018.

“Për shkak të moskryerjes së detyrimeve të lartëpërmendura nga ana e Presidentit Ivanov, kurse për shkak të obligimeve nga Neni 52 i Kushtetutës së Maqedonisë, Kryetari i Kuvendit është i obliguar ta dorëzojë Ligjin për përdorimin e gjuhëve në Gazetën Zyrtare’

Me këtë, përveç gjuhës maqedone, në institucionet gjuhë zyrtare bëhet edhe gjuha shqipe, që do të zbatohet në komunikim, përdorim dhe zbatim në të gjitha procedurat e qytetarëve para të gjithë organeve që përbëjnë autoritetin shtetëror.

Ligji obligon gjykatat, prokuroritë publike, si dhe të gjithë organet tjerë, trupat dhe institucionet tjera të mundësojnë shfrytëzimin, përdorimin dhe zbatimin e cilës do gjuhë zyrtare dhe shkrimit të saj në procedurat.

Së bashku me Ligjin për gjuhët, Kryeparlamentari Talat Xhaferi në “Gazetën Zyrtare” e ka dërguar edhe Ligjin për Ratifikimin e Marrëveshjes me Greqinë që gjithashtu nuk ishte nënshkruar nga presidenti Ivanov. Dy dokumentet janë publikuar në numrin e ri të “Gazetës Zyrtare”. /Klan Maqedoni/

 

 

 

read more
Top LajmeVendi

KRYEPARLAMENTARI XHAFERI FIRMOS LIGJIN PËR GJUHËT

Untitled

Kryetari i Kuvendit të Maqedonisë, Talat Xhaferi, ka nënshkruar Ligjin për Gjuhët dhe i njëjti është publikuar në gazetën Zyrtare të Maqedonisë. Këtë informacion e ka publikuar edhe vetë Kryeparlamentari Xhaferi në profilin e tij në Facebook.

Ligji për Gjuhët u miratua më 11 janar të vitit të kaluar në situatë të tensionuar mes deputetëve. Pas votimit në lexim të dytë me 69 vota “për”, presidenti, Gjorgje Ivanovi, nuk e dekretoi me arsyetimin se  ky ligj është në kundërshtim me Kushtetutën dhe se është sjellë në kundërshtim me rregulloren e Kuvendit.

Sipas procedurës, Ligji u kthye për rivotim në institucionin ligjvënës. Në lexim të tretë, ai përsëri mori miratimin e shumicës së deputetëve. Ndërkaq, në bazë të Kushtetutës së Maqedonisë, pas kalimit në lexim të tretë, nënshkrimi nga ana e Presidentit nuk është i nevojshëm. /Klan Maqedoni/

read more
Top LajmeVendi

SUBVENCIONIMI I FLUTURIMEVE: WIZZ AIR ME TETË DESTINACIONE TË REJA

Screenshot_2

Sugareski: Subvencionimi në të mirë të qytetarëve


Me tetë destinacione të reja gjatë tre viteve të ardhshme dhe fluturime më të shpeshta në disa nga rrugët ekzistuese u angazhua avio-kompania Vizer, për çka nga tatim-paguesit e Maqedonisë do të marrë subvencione në vlerë prej pesë milionë eurove. Marrëveshja e rinovuar për herë të tretë, që sot e nënshkruan ministri i Transportit Goran Sugareski dhe Xhorxh Mihalopulos, përfaqësues i kompanisë, u arrit pas tenderit shtetëror për subvencionimin e avio-kompanive me buxhet të ulët të shpallur tri herë, me çrast kandidat i vetëm ishte aviotransportuesi hungarez.

Në mungesë të aviotransportuesëve të vendit, kompania hungareze me buxhet të ulët, Vizer është operatori i vetëm në të dy aeroportet në Shkup dhe Ohër. Marrëveshje e re e nënshkruar me qeverinë e obligon që gjatë tre viteve të ardhshme të hapë sëpaku gjashtë linja të reja, dy nga Shkupi dhe katër nga Ohri në drejtim të Gjermanisë, Suedisë, Finlandës, Italisë dhe Qipros. Për çdo aviobiletë të udhëtarëve që do të udhëtojnë nga Maqedonia, shteti do të paguajë nga 7 deri në 13 euro. Pyetjes së gazetarëve se cilin e ndihmon më shumë Qeveria me paratë e tatimpaguesëve, Vizerin, operatorin e aeroporteve ose të pasurit që munden t’i lejojnë vetes udhëtime, ministri Sugareski u përgjigj:

“Logjika është që të ndihmojmë qytetarët. As për Vizerin e as për Ministrinë e Transportit. Konsiderojmë se kjo është një masë e mirë jo vetëm për aeroprotin e Shkupit, por edhe për aeroportin Shën Apostol Pavle dhe kështu zhvillohemi seriozisht.” deklaroi Goran Sugareski, Ministër i Transortit dhe Lidhjeve.

Nga 4500 të punësuarëve në Vizer, 190 janë rekrutuar nga vendi ynë, ndërsa për muajin e ardhshëm është paralajmëruar një shpallje e re për kuadër vendor, kryesisht për të rinjë të cilët u shërbejnë udhëtarëve në aeroplanë. Xhorxh Mihalopulos, i cili sot në emër të kompanisë e nënshkroi marrëveshjen e re tre vjeçare, e sqaroi biznes modelin dhe planin e ri afarist në vend:

“Biznes modeli ynë mbështetet në përcaktimin tonë që të jemi biznes digjital…14.55. Jo vetëm që do të kemi edhe tetë rrugë të reja, por edhe shërbimet tona do t’i rrisim, në drejtim të Geteburgut ku fluturimet nga katër do të  rriten në pesë, për Hamburg nga dy në tre, për Këlnin nga tre në katër. Në drejtim të Maltës si destinacion atraktiv nga dy do të kemi tri fluturime në javë, dhe për në Bazelin tre fluturime në javë. Pra do të kemi 38 rrugë në 16 vende.” –shprehet Xhorxh Mihalopulos, VIZER.

Gjatë periudhës së kaluar Vizer me çmime të lira e lidhi Maqedoninë me vendet ku punojnë mërgimtarët tanë, por edhe me Kosovën fqinje, mënjanoi kompani të shumta me shërbime shumë më të shtrenjta, për çka pati edhe reagime nga Bashkimi Evropian. Maqedonia tanimë disa vite është duke menduar që të ketë një aviotransportues kombëtar, por ky bashkëpunim, me sa duket, tani për tani mbetet më i liri dhe më me leverdi. /Biljana Georgievska/

 

 

 

read more
Top LajmeVendi

GOSTIVAR: MUNGESË KUADRI NË NJËSITIN E ZJARRFIKËSVE

Screenshot_1

Taravari: Pushteti qendror pengon punësime të tjera


Njësiti i zjarrfikësve të Gostivarit, po përballet me mungesën e numrit të zjarrfikësve. Ky njësit posedon vetëm gjysmën e të njëjtëve nga sa është e nevojshme. Nga komuna e Gostivarit deklarojnë se pushteti qëndror pengon punësime të tjera.

Njësiti i zjarrfikësve të Gostivarit, krahas kushteve përballet edhe me mungesën e zjarrfikësve. Ky njësit, nga numri i përgjithshëm 80 që duhet të ketë të punësuar, ka vetëm 44 prej tyre. Sipas përgjegjësit në këtë njësit, Jusuf Bajrami, kërkesa për zjarrfikës ka, mirëpo të njëjtit nuk pranohen.

Kryetari i komunës së Gostivarit, Arben Taravari, deklaroi se pushteti qëndror shkakton pengesa në rritjen e numrit të punësimit të zjarrfikësve.

Njësiti i Zjarrfikësve i Gostivarit, mbulon komunën e Gostivarit, Vrapçishtit, Mavrovës dhe Rostushës. Sipas të dhënave nga ky njësit, numri i përgjithshëm mujor i intervenimeve, muajt e fundit ka qenë rreth 40.

Ndryshe, sot në komunën e Gostivarit u shpërndanë 300 palë uniforma nga kompania Eagle, ku me uniforma u pajisën edhe zjarrfikësit e Gostivarit. /Blerona Jakupi/

 

read more
Top LajmeVendi

RASTI “TALIR”: GJYKATËSI OSMAN SHABANI DO TA UDHËHEQË RASTIN

Screenshot_1

Lënda e Prokurorisë me emrin “Talir” është formuar pas pranimit të akuzës së Prokurorisë Speciale dhe sipas sistemit AKMIS për shpërndarje të lëndëve i është ndarë gjykatësit Osman Shabani, informojnë nga Gjykata Themelore Shkupi 1.  Gjykatësi Shabani i udhëheq lëndën “Titanik” dhe “Toplik”, ndërkaq është dhe gjykatës në lëndën “Monstra”.

Ndryshe, Gjykata Penale në tërësi e ka pranuar aktakuzën e rastit “Talir” të Prokurorisë Speciale Publike, që ka të bëjë me furnizimin joligjor të VMRO-DPMNE-së. Në rastin “Talir” për financimin joligjor të partisë politike të VMRO-DPMNE-së akuzohen Nikolla Gruevski, i cili ka marrë azil politik në Hungari, Kiril Bozhinovski, Mile Janakievski, Ilija Dimovski, Lleko Ristoski dhe Elizabeta Çingarovska. /Klan Maqedoni/

 

read more
Top LajmeVendi

PLANI 18: OSMANI-KËTË VIT REZULTATE KONKRETE NGA REFORMAT

bujar-osmani-0114_1547461638-9637270

Zv/Kryeministri takon ambasadorët e vendeve anëtare të BE-së


Me implementimin e Marrëveshjes së Prespës përmes miratimit të ndryshimeve kushtetuese në Kuvend, arritëm t`i mbyllim të gjitha çështjet e hapura politike, duke lënë hapësirë për implementim më të thellë të procesit reformues – ka thënë Zv/Kryeministri Bujar Osmani në takim me ambasadorët e vendeve anëtare të BE-së në Maqedoni, para të cilëve ka prezantuar statusin e implementimit të Planit 18.

Siç njoftuan nga Kabineti i tij, Zv/Kryeministri Osmani është prononcuar rreth aktiviteteve që janë realizuar deri më tani nga plani reformues 18, si dhe rreth sfidave për implementimin e mëtutjeshëm.

“Kemi progres serioz praktikisht në të gjitha sferat e Planit 18: në gjyqësor, ku numër i madh ligjesh janë në fazën finale; reforma në shërbimet e sigurisë, ku sistemi i përgjimit tani më është i ndarë në mënyrë adekuate nga sistemi i sigurisë dhe kundërzbulimit; ndërkaq progres ka edhe në aktivitetet e parapara me reformat në administratën publike.”- njoftuan nga kabineti i Zv/Kryeministri Osmani.

Duke shprehur kënaqësi nga realizimi i Planit 18 në të gjitha sferat, Zv/Kryeministri Osmani ka theksuar se ditën e parë të punës këtë vit, u thirr Komiteti i Punës për Integrime Evropiane, ku struktura më e lartë udhëheqëse e gjithë administratës shtetërore referuan për reformat e Planit 18, duke dhënë bindje para ambasadorëve se Plani 18 do të jetë i implementuar në kohë, me qëllim që zbatimi i tij të shënohet në mënyre adekuate në Raportin e ardhshëm të Komisionit Evropian për vendin.

Në fund Osmani shprehu mirënjohje deri te ambasadorët e vendeve – anëtare të BE-së, për mbështetjen e tyre në procesin reformues, dhe në përgjithësi, integrimeve evropiane të vendit, duke shprehur shpresën se kjo mbështetje do të rezultojë edhe me rezultate konkrete këtë vit, që nga fillimi i negociatave për anëtarësim të plotë në Bashkimin Evropian. /Klan Maqedoni/

 

 

 

read more
Top LajmeVendi

TSIPRAS: NUK BËJMË PRAPA PËR MARRËVESHJEN E PRESPËS

Aleksis-Tsipras-660×330

Deputetët të votojnë sipas ndërgjegjes së tyre


Kryeministri grek, Aleksis Tsipras, ka theksuar edhe një herë vendosmërinë e tij për të votuar dhe vënë në zbatim marrëveshjen e Prespës. Tsipras foli të dielën në mbrëmje në Athinë, në një veprimtari të titulluar “Basti i Marrëveshjes së Prespës”, ku përveç figurave të partisë së tij SYRIZA, ndodheshin edhe përfaqësues nga forca të tjera politike të qendrës së majtë.

Fillimisht, kryeministri grek tregoi zanafillën e përpjekjeve që u kurorëzuan në qershor 2018 me nënshkrimin e marrëveshjes buzë liqenit të Prespës. Tsipras tha se kur në verën e 2017-s u zgjodh kryeministër Zoran Zaev, “u ndodhëm para një shansi të vërtetë, por edhe një dileme kruciale. Ne vendosëm të ngremë barrën historike, duke marrë përsipër edhe riskun politik, por edhe koston politike të kësaj procedure”, tha kryeministri grek.

Duke përgëzuar homologun e tij Maqedonas për kurajën, Tsipras theksoi se as ai nuk ka për të bërë prapa.

“Dua të falënderoj kryeministrin e Maqedonisë së veriut, Zoran Zaev për kurajën dhe guximin që tregoi që nga fillimi e deri në fund të procesit. Ta përgëzoj sepse nuk u zbraps përballë manifestimeve të nacionalizmit e të urrejtjes që organizoi VMRO… Ashtu siç nuk u zbrapsën ata, as ne nuk do të bëjmë prapa”, tha Tsipras, ndërsa salla reagoi me duartrokitje të fuqishme.

Në prag të mbërritjes në parlamentin grek të Marrëveshjes së Prespës, Tsipras u bëri thirrje gjithë deputetëve që të votojnë sipas ndërgjegjes së tyre.

“Deputetët e parlamentit, të cilësdo partie qofshin, që do të ftohen të marrin një përgjegjësi historike, do të ngrenë zërin e ndërgjegjes dhe do të votojnë mbi bazën e ndërgjegjes së tyre dhe mbi bazën e asaj që përbën interes kombëtar.”- vlerësoi Kryeministri grek, Aleksis Tsipras.

Tsipras e mbylli fjalën e tij duke thënë se Marrëveshja e Prespës është edhe historike, edhe patriotike, edhe e dobishme për kombin. /Robert Goro/

 

read more
1 2 3 4 680
Page 2 of 680